Siplôh njang rajek tanda kiamat, Nabi Muhammad na neu meusabda,
Oh katrôh watèë katoë kiamat, Geubri alamat siplôh boh tanda.
Tanda njang keu phôn Nabi hareutoë, Rata djeuët nanggroë kajém that geumpa,
Tanda keu dua meunan tjit bagoë, rata djeuët nanggroë dji-ék ië raja
Tanda yg keu lhèë wahai dum kawôm, Keudè dum tutông dusôn deungön kuta,
Rata djeuët nanggroë tadeungö tutông, Kuta ngön gampông bandum seureuta.
Tanda yg keu peuët aduën ngön adoë, Rata djeuët nanggroë meuprang saudara,
Kaphé ngön kaphé hana reuda prang, Ureuëng Islam pih sama sadja.
Tanda keu limöng wahai dum sahbat, Rata djeuët simpang keudè meubanja,
Kateudöng keudé rata djeuët simpang, Meukat makanan puëpuë njang hawa.
Tanda njang keu nam wahai dum rakan, Dilèë gasiën that djinoë ka kaja,
Djinoë ka kaja hareuta le that, Rumöh meu tingkat djeundeula katja,
Tanda keu tudjôh hai bungöng sirön, Dilèë kön kaja that jinoë ka papa,
Hareuta tanlé blang deungön lampôh, Tjit tinggai teubôh hudép seungsara.
Tanda keu lapan geu kheun lé Nabi, Ureuëng ék Hadji ramé lagoina,
Ramé meuleumpah ureuëng ék haji, Ladôm pèng sutji ladôm pèng riba.
Ladôm njang kaja bak tjok tông djudi, Meutamah lagi agèn bak Tjina,
Ladôm njang kaja bak agèn tjandu, Na njang meukat bu buleuën puasa.
Asai ka kaja ladju u Meukah, Bateuë deungön sah hana djikira,
Tanda sikureuëng leumpah göt reugam, Inong ngön agam hana lé beda.
Inong sôk leuweuë agam panjang ôk, Ka sapeuë anggôk pikiran sama,
Ta eu sôk leuweuë sang aneuëk agam,Ta ngiëng ôk panjang sang aneuëk dara.
Tanda keu siplôh Nabi riwajat, Rakjat meu larat dusôn ngön banda,
Ureuëng njang meukat palak djih that-that, Kadji tjok padjak meulipat ganda.
Nibak masa njan han soë pakoë, Peumimpin nanggroë adé tan lé na,
Rakjat ban kaméng ikat lam uroë, Pemimpin nanggroë buas ban singa.
Oh batjut salah rakjat lam nanggroë, Bôh bajoê beusoë djitrom djitampa,
Njö han ta turôt lagèë dji peugah, Keunöng beureukah masôk peundjara.
Bandum beuta turôt lagèë dji peugah, Meunjö tabantah di ilanj’a
Rakjat lam nanggroë dum teuhah babah, Lagèë kaméng grah dalam uroë kha.
Nibak masa njan han ék soë piké, Ulama jahé masa njan teuka
Ulama jahé leumpah that kaplat, Hadih ngön ajat di tuka tuka.
Ulama jahé leumpah that deungki, Sabé di tjatji alam pukaha,
Bak hadih dha’if sinan di meudöng, Laén bandum kön han di peutjaya.
Aneuëk peusantrèn di peugah salah, Watèë khutbah di thok thok dada,
Di peugah hukôm njang salah-salah, Di mita meugah bak ureuëng donya.
‘Ôh noë keuh meutöng tanda njang siplôh, Alèh tjit ka trôh tji neu peunjata..???
Dayah Atjèh 